મારો અનહદ સાથે નેહ !
મુને મળ્યું ગગનમાં ગેહ.
ખરી પડે તો ફૂલ ન ચૂંટું,
મરી મટે તે મીત;
મનસા મારી સદા સુહાગણ
પાતી અમરત પ્રીત:
અનંત જુગમાં નહીં અમારે
એક ઘડીનો વ્રેહ !
મુને મળ્યું ગગનમાં ગેહ.
ચારે સીમ પડી’તી સૂની
માથે તીખો તાપ;
મેઘરવા મુને હરિ મળ્યા ત્યાં
અઢળક આપોઆપ !
મીટ્યુંમાં વરસ્યો મોતીડે
મધરો મધરો મેહ !
મુને મળ્યું ગગનમાં ગેહ.
સતનાં મેલી રંગ સોગઠાં
ખેલું નિત ચોપાટ,
જીવણને જીતી લીધા મેં
જનમ જનમને ઘાટ;
ભેદ ન જાણે ભોળી દુનિયા
ખોટી ખડકે ચેહ !
મુને મળ્યું ગગનમાં ગેહ.
– મકરન્દ દવે
Filed under: મકરન્દ દવે | Tagged: અઢળક આપોઆપ, અનંત જુગમાં નહીં અમારે, અનહદ સાથે નેહ, એક ઘડીનો વ્રેહ, ખરી પડે તો ફૂલ ન ચૂંટું મરી મટે તે મીત, ચારે સીમ પડી’તી સૂની, પાતી અમરત પ્રીત, મધરો મેહ, મનસા મારી સદા સુહાગણ, માથે તીખો તાપ, મીટ્યુંમાં વરસ્યો મોતીડે, મુને મળ્યું ગગનમાં ગેહ, મેઘરવા મુને હરિ મળ્યા ત્યાં | 3 Comments »
"ગુજરાતી ગઝલ™" 